Koçeku: Të hetohet thirrja e Janko Baçevit kundër studentëve shqiptarë

Deputetja e pavarur në Kuvendin e Shqipërisë, Marjana Koçeku, ka reaguar publikisht ndaj deklaratave të kryetarit të partisë “Maqedonia e Bashkuar”, Janko Baçev, duke kërkuar reagimin e institucioneve. Sipas saj, kreu i kësaj partie pro-ruse ka nxitur dhunë ndaj studentëve shqiptarë në Maqedoninë e Veriut.

Koçeku thekson se Baçev është shprehur se studentëve shqiptarë, të cilët protestojnë për të drejtat e tyre dhe kërkojnë që provimi i jurisprudencës dhe provimet e tjera profesionale shtetërore të zhvillohen në gjuhën shqipe, duhet t'u jepen «dy-tri shuplaka edukuese dhe t’i kthejnë në shtëpi». Deputetja kërkon që kjo gjuhë të dënohet fuqishëm dhe organet kompetente të ndërmarrin veprimet e nevojshme.

Studentët shqiptarë në Maqedoninë e Veriut kanë organizuar disa protesta për mundësinë e dhënies së provimeve shtetërore në gjuhën amtare. Koçeku vlerëson se «Kjo gjuhë dhe nxitje dhune që vjen nga kryetari i një partie pro-ruse ndaj studentëve shqiptarë atje duhet dënuar fuqishëm dhe të trajtohet nga organet kompetente».