KGJK pezullon gjyqtarin Gashi pas arrestimit për keqpërdorim detyre

Këshilli Gjyqësor i Kosovës (KGJK) ka marrë vendim për suspendimin e gjyqtarit Avdirrahman Gashi, pas arrestimit të tij nën dyshimin për veprën penale "Keqpërdorimi i pozitës apo autoritetit zyrtar". Lajmin e kanë konfirmuar burime të "Betimi për Drejtësi".

Vendimi u mor gjatë vazhdimit të takimit të 371-të të Këshillit, i cili u mbajt me dyer të mbyllura, ku u diskutua kjo pikë e rendit të ditës. Në njoftimin e Këshillit thuhet se pas shqyrtimit të rastit disiplinor, është themeluar paneli hetimor dhe është vendosur suspendimi i subjektit të hetimit deri në një vendim tjetër.

Më herët, Gjykata Themelore në Prishtinë, Departamenti Special, kishte caktuar masën e paraburgimit prej një muaji ndaj Gashit, vendim i cili u konfirmua edhe nga Gjykata e Apelit.