KGJK dënon sulmin ndaj gjyqtares Qëndresa Sejdiu në Viti
Këshilli Gjyqësor i Kosovës ka reaguar pas sulmit ndaj gjyqtares Qëndresa Sejdiu në fshatin Sadovinë e Jerlive.
Redaksia ZHURMA · · 1 min lexim
GJILAN — Këshilli Gjyqësor i Kosovës ka dënuar ashpër sulmin ndaj gjyqtares së Gjykatës Themelore në Gjilan, dega në Viti, Qëndresa Sejdiu. Ngjarja ka ndodhur pasditen e 4 nëntorit në fshatin Sadovinë e Jerlive, ndërsa Këshilli e ka cilësuar këtë akt si cenim të sistemit të drejtësisë dhe të vetë sundimit të ligjit.
Sipas Këshillit Gjyqësor, «sulmet e këtij lloji ndaj gjyqtarëve janë të papranueshme dhe të patolerueshme». Institucioni ka theksuar se mbështet fuqishëm gjyqtarët në përmbushjen e detyrave të tyre në mënyrë të pavarur, të paanshme dhe profesionale në shërbim të interesit publik.
Pas këtij rasti, Këshilli u ka bërë thirrje organeve kompetente që të ndërmarrin të gjitha veprimet e nevojshme për hetimin e menjëhershëm të ngjarjes, si dhe për të garantuar mbrojtjen dhe sigurinë e gjyqtarëve në përputhje me detyrimet kushtetuese dhe ligjore.
