Diplomohet gjenerata e 63-të e Policisë së Kosovës me rreth 400 pjesëtarë të rinj

Rreth 400 pjesëtarë të rinj i janë bashkuar Policisë së Kosovës gjatë ceremonisë së diplomimit të Gjeneratës së 63-të, duke marrë zyrtarisht përgjegjësinë për të ruajtur rendin dhe sigurinë publike, për t'i shërbyer vendit dhe për të zbatuar ligjin. Në radhët e kësaj gjenerate të re bëjnë pjesë edhe 118 vajza dhe gra që kanë zgjedhur t'i bashkohen institucionit policor.

Kadetët e rinj janë zotuar se do t'i përmbahen Kushtetutës dhe ligjeve të vendit, duke dhënë betimin zyrtar se do të mbrojnë sovranitetin dhe integritetin territorial të Republikës së Kosovës. Teksti i betimit përfshin zotimin për t'u bindur urdhrave të mbikëqyrësve dhe për t'i kryer detyrat me profesionalizëm, përgjegjësi e ndershmëri në interes të të gjithë qytetarëve, pa dallim përkatësie etnike, gjinie, religjioni apo ngjyre.