Pse mblodhi KFOR-i pesë komunitete fetare nën një çati në Pejë?

PEJË — Komanda Rajonale Perëndim (RC-W) e KFOR-it ka organizuar në Kampin "Villaggio Italia" në Pejë një takim ndërfetar, duke bashkuar përfaqësues të pesë komuniteteve fetare: myslimane, ortodokse, katolike, hebraike dhe tarikatëve nga zona e përgjegjësisë së RC-W.

Takimi u drejtua nga komandanti i RC-W, koloneli Federico Mora. Tema e zgjedhur, "Përmes zgjedhjes së dialogut, mund të ndërtojmë të ardhmen", pasqyroi qëllimin kryesor: promovimin e dialogut ndërfetar, mirëkuptimin dhe forcimin e besimit ndërmjet komuniteteve fetare.

Sipas njoftimit të KFOR-it, aktiviteti shërbeu si forum i hapur dhe i paanshëm për shkëmbimin e ideve dhe nxitjen e bashkëjetesës. Misioni theksoi rëndësinë e komunikimit dhe bashkëpunimit ndërmjet komuniteteve të ndryshme si kusht për të ardhmen e përbashkët.

Nxënësit e Shkollës së Artit në Pejë prezantuan punime artistike që përcollën mesazhe dialogu dhe harmonie. Diskutimet u pasuruan gjithashtu nga reflektime të të rinjve mbi paqen, respektin e ndërsjellë dhe jetesën e përbashkët ndërmjet komuniteteve.

KFOR theksoi se organizime të tilla pasqyrojnë angazhimin e vazhdueshëm të misionit për të bashkëpunuar me të gjitha komunitetet, duke kontribuar në një mjedis të sigurt për të gjithë qytetarët. Mandati i KFOR-it, i vlerësuar edhe nga NATO-ja, bazuar në Rezolutën 1244 të OKB-së, vazhdon zbatimin me Policinë e Kosovës dhe EULEX.

Burim: Ekonomia Online
— Redaksia ZHURMA