Çfarë u vlerësua nga ministrat e NATO-s për situatën e sigurisë në Kosovë?

BRUKSEL — Ministri në detyrë i Mbrojtjes, Ejup Maqedonci, deklaroi nga selia qendrore e NATO-s se mbledhja e 35-të e Grupit të Kontaktit për Mbrojtjen e Ukrainës u përqendrua në situatën në fushëbetejë, duke rikonfirmuar mbështetjen e aleancës për Kijevin dhe nënvizuar rolin aktiv të Kosovës si kontribuuese e kësaj koalicioni.

Presidenti ukrainas Volodymyr Zelensky dhe ministri i mbrojtjes ukrainas prezantuan "zhvillimet e fundit në fushëbetejë, në linjën e frontit" mes Ukrainës dhe Federatës Ruse. Maqedonci theksoi se "dihet që është viti i katërt i luftës" — dhe situata mbetet e vështirë për Ukrainën.

Megjithatë, "të gjithë ministrat rikonfirmuan edhe njëherë mbështetjen për Ukrainën." Shumë shtete, mes tyre edhe Kosova, "po vazhdojnë që të ndihmojnë Ukrainën në këto çaste, në këto ditë të vështira," tha Maqedonci.

Kosova figuron si "anëtare me të drejta të plota" e Grupit të Kontaktit dhe si "kontribuuese aktive": ka dhënë donacion me pako ushtarake në vitin 2023 dhe vazhdon të trajnojë trupa ukrainase, si brenda territorit të saj, ashtu edhe në Mbretërinë e Bashkuar, si pjesë e Operacionit Interflex.

Ky operacion "tashmë është në përfundim", tha Maqedonci — por Kosova ka "shfaqur gatishmërinë për të marrë pjesë edhe në aktivitete të tjera në mbështetje të përgatitjes së trupave ukrainase taktikisht për luftën kundër agresorit rus", sipas fjalëve të tij.

Gjatë vizitës, ministri zhvilloi takime bilaterale me homologë të shumë vendeve, ku temë qendrore ishte siguria në Ballkanin Perëndimor. "Pata rastin që të takoj veç e veç shumë prej ministrave, me të cilët biseduam rreth çështjes së sigurisë", tha ai, "me theks të veçantë në Republikën e Kosovës."

Vlerësimi i homologëve ishte unanim: siguria e Kosovës "është përmirësuar dukshëm." Ky konstatim ka çuar drejtpërdrejt në vendimin për zvogëlimin e trupave të KFOR-it, duke i kthyer ato "në gjendjen që ka qenë para sulmeve të terroristëve dhe kriminelëve, të grupeve të Radoiçiqit dhe grupeve të tjera", sipas Maqedonit.

Burim: Zëri
— Redaksia ZHURMA