Cilat janë pesë kërkesat e protestuesve para kryeministrisë në Tiranë?
Qytetarët dhe aktivistët në Tiranë kërkojnë dorëheqjen e Edi Ramës dhe anulimin e ligjeve për investitorët strategjikë e zonat e mbrojtura.
TIRANË — Qytetarët dhe aktivistët në Shqipëri u mblodhën sërish këtë të premte në bulevardin “Dëshmorët e Kombit”, duke shënuar ditën e 13-të të protestave. Tubimi nisi në orën 18:00 në sheshin “Skënderbej”, për të marshuar drejt godinës së qeverisë ku u mbajtën fjalime.
Kërkesa kryesore e tyre është dorëheqja e kryeministrit Edi Rama. Sipas organizatorëve, tubimet do të vazhdojnë me marshime në rrugët kryesore të Tiranës deri në mesnatë. Gjatë këtyre protestave janë dëgjuar thirrje të vazhdueshme dhe të ashpra kundër të gjithë klasës politike.
Kjo lëvizje nisi fillimisht si reagim ndaj projektit turistik në Pishë Poro dhe Sazan, duke hyrë sot në ditën e dhjetë të saj. Më pas, ky mobilizim u zgjerua dhe organizatorët prezantuan kërkesat e tyre të cilat mbeten të pandryshuara.
Ata kërkojnë shfuqizimin e statusit të investitorëve strategjikë, anulimin e Paketës së Maleve dhe anulimin e ndryshimeve në Ligjin për Zonat e Mbrojtura. Po ashtu, kërkohet anulimi i ndryshimeve në Ligjin për Trashëgiminë Kulturore dhe largimi i plotë i qeverisë.
Nga ana tjetër, Komisioni Europian po i ndjek zhvillimet në zonën Pishë Poro-Nartë. Zëdhënësi Guillaume Mercier njoftoi se punimet janë pezulluar dhe se pritet një vlerësim gjithëpërfshirës i ndikimit në mjedis, i cili do të zhvillohet në konsultim me shoqërinë civile.
Për këtë çështje ka nisur hetime edhe SPAK, duke bllokuar llogaritë bankare të pronarëve të tokës dhe duke sekuestruar 195 milionë dollarë të transferuara drejt tyre nga vëllezërit nga Katari. Ndërkohë, organi i akuzës po verifikon edhe vendimet gjyqësore për titujt e pronësisë.
Burim: Portalb
— Redaksia ZHURMA