Çfarë e bllokon katalogun e teksteve për 2026/2027?

PRISHTINË — Katalogu i teksteve shkollore për vitin 2026/2027 ende nuk u është dërguar komunave nga Ministria e Arsimit, ndonëse procesi mësimor ka përfunduar më 19 qershor. Kjo vonesë kërcënon me probleme në fillimin e vitit të ri shkollor. Edhe këtë vit, pajisja e nxënësve në nivelin fillor me tekste do të bëhet përmes subvencionimit të prindërve, por pa katalog, komunat nuk mund të fillojnë përzgjedhjen.

Sipas Drejtorisë Komunale të Arsimit (DKA) në Ferizaj, katalogët ishin paraparë të dorëzoheshin javën e kaluar. Afrim Llabjani, drejtor i Arsimit në Ferizaj, ka thënë: "Akoma nuk i kemi marrë këta katalogë dhe po presim edhe këto dy-tri ditë të kësaj jave. Nga java e ardhshme, një pjesë e madhe e komunave shkojnë në pushim, dhe deri kah mesi i gushtit ne nuk i kemi mësimdhënësit në proces." Ai ka shtuar se vonimi mund të sjellë vonesa në fillimin e vitit shkollor.

Avni Fetahu, drejtor i Arsimit në Podujevë, e quan këtë "javën e fundit ideale" për dorëzim. "Mësimdhënësit deri më 15 korrik duhet të paraqiten në shkollë për planet e tyre për zgjedhjen e librave. Nëse dorëzohen në këtë kohë, është koha ideale për t'i përzgjedhur dhe për të vazhduar tutje me implementimin e pagesave," ka thënë Fetahu. Ai ka njoftuar se mund të ketë ndryshime në nivelet e financimit për tekstet shkollore.

Eksperti i arsimit, Jonuz Salihaj, shprehet se shqetësimet në nivel komunal janë të arsyeshme, pasi përzgjedhja e teksteve kërkon kohë dhe nuk është aq e thjeshtë. "Kemi edhe tekste alternative dhe për aktivet profesionale të shkollave kjo kërkon kohë shtesë që tekstet të analizohen me kujdes," ka thënë Salihaj. Ai ka theksuar se tekstet shkollore nuk i plotësojnë të gjitha karakteristikat, si ato shkencore, pedagogjike, metodologjike apo teknike, prandaj mësimdhënësve u nevojitet kohë për t'i zëvendësuar me materiale të tjera shkollore.

Salihaj ka kritikuar subvencionimin si të shtrenjtë për buxhetin e shtetit dhe problematik, duke thënë se MASHTi duhet të heqë dorë nga ky proces. MASHTI nuk iu është përgjigjur pyetjeve të gazetës KOHA për datën e dorëzimit të katalogëve.

Burim: Koha.net
— Redaksia ZHURMA