Vuqiterna i kërkon Vitisë sigurimin e terapisë për fibrozë cistike

Vlora Vuqiterna, ish-kandidate për deputete dhe nënë e një vajze me fibrozë cistike, i ka drejtuar një thirrje publike ministrit të Shëndetësisë, Arben Vitia, për sigurimin e terapisë Trikafta ose Kaftrio për pacientët në Kosovë. Nëpërmjet një postimi në rrjetet sociale, ajo ka kërkuar që kërkesa e përsëritur e Shoqatës së Fibrozës Cistike të trajtohet me urgjencë nga dikasteri shëndetësor.

Vuqiterna ka theksuar se familjet përballen me pritje shumëvjeçare për këtë trajtim, ndërsa vonesat dhe mungesa e ilaçeve po shtyjnë disa prej tyre të shqyrtojnë mundësinë e migrimit. Sipas të dhënave të përmendura prej saj, dikur kanë qenë të regjistruar mbi 170 pacientë me këtë gjendje, kurse tani numri llogaritet rreth 60 persona. Pavarësisht kostove të larta financiare të mjekimit, ajo ka ftuar autoritetet që shëndetin e fëmijëve ta vendosin në plan të parë. «Ne nuk po kërkojmë privilegj. Po kërkojmë të drejtën për jetë, frymëmarrje dhe trajtim dinjitoz për fëmijët tanë», ka shkruar ajo mes tjerash.