Çfarë gjobe do të paguajnë prindërit e fëmijëve dhunues në shkollat e RMV-së?
Ministrja e Arsimit në RMV, Vesna Janevska, njoftoi ndryshime ligjore që parashikojnë gjobë për prindërit e fëmijëve që ushtrojnë dhunë në shkollë.
SHKUP — Ministrja e Arsimit dhe Shkencës në RMV, Vesna Janevska, njoftoi se çdo prind i një fëmije që sillet dhunshëm në shkollë do të gjobitet me 250 euro, përfshirë rastet kur prindi refuzon të bashkëpunojë me shkollën ose institucionet e tjera.
Janevska sqaroi se Sekretari i Shtetit në ministrinë e saj aktualisht po zhvillon bisedime me deputetë për të finalizuar propozimet. "Ndryshimet do të bëhen dhe gjoba prej 250 eurosh do të mbetet për çdo akt të dhunshëm të kryer nga fëmija, por edhe, gjë që është shumë e rëndësishme, kur prindi refuzon të bashkëpunojë me shkollën dhe institucionet e tjera", tha ajo.
Ministrja më parë njoftoi ndryshime në Ligjin për Arsimin Fillor që do të parashikonin gjobën e njëjtë. Ministria thekson se roli i prindërve është thelbësor, ndërsa rastet e fundit të dhunës nga bashkëmoshatarët i quan "alarm për shoqërinë".
Burim: Gazeta Express, https://www.gazetaexpress.com/janevska-prinderit-femijet-e-te-cileve-ushtrojne-dhune-ne-shkolle-do-te-paguajne-gjobe-prej-250-euro/
— Redaksia ZHURMA