Infermieri kërkon hetim disiplinor ndaj drejtorit të Neurokirurgjisë në QKUK

Infermieri Enlirat Duraku i është drejtuar Komisionit Disiplinor të Qendrës Klinike Universitare të Kosovës (QKUK) me një letër të hapur, duke kërkuar shqyrtimin e veprimeve të drejtorit të Klinikës së Neurokirurgjisë, Besnik Elshani. Rasti lidhet me një denoncim të bërë ndaj një infermiereje të kësaj klinike, e cila, sipas Durakut, u akuzua për vjedhje klipash.

Në letër, Duraku pretendon se organizatat që mbrojnë të drejtat e infermierëve dhe Divizioni për Infermieri nuk e kanë mbështetur kolegen e tij, duke e lënë atë të përballet e vetme me akuza që ai i quan të pabaza. Ai thekson se, bazuar në vendimin e gjykatës kompetente, infermierja është shpallur e pafajshme dhe se denoncimi nuk ishte mbështetur në prova konkrete.

Duraku kërkon nga Komisioni Disiplinor që të verifikojë nëse drejtori Elshani ka pasur prova të mjaftueshme për pretendimin, nëse janë respektuar procedurat institucionale gjatë paraqitjes së denoncimit dhe nëse infermieres i është shkaktuar dëm profesional apo reputacional. Ai vlerëson se akuza të tilla mund të dëmtojnë reputacionin, dinjitetin dhe marrëdhëniet e punës së një punëtori shëndetësor.