Inflacioni në Zvicër arrit në 1.5 për qind gjatë muajit tetor

Inflacioni në Zvicër është rritur në 1.5 për qind gjatë muajit tetor 2026, nga 1 për qind sa ishte në shtator, duke shënuar nivelin më të lartë në vend që nga dhjetori i vitit 2023. Të dhënat e publikuara tregojnë se kjo rritje e çmimeve ka tejkaluar pritshmëritë e ekonomistëve, të cilët kishin parashikuar një normë prej 1.1 për qind deri në 1.4 për qind.

Sipas Zyrës Federale të Statistikave, një nga faktorët kryesorë që ka ndikuar në këtë ecuri është shtrenjtimi i produkteve të naftës, ku çmimet gjatë tetorit ishin rreth 40 për qind më të larta krahasuar me periudhën e njëjtë të vitit të kaluar. Rritja është vërejtur veçanërisht te nafta për ngrohje, benzina dhe dizeli, duke ndikuar drejtpërdrejt në indeksin e çmimeve të konsumit. Krahasuar me muajin shtator, çmimet e konsumit janë rritur për 0.2 për qind, ndërsa indeksi kombëtar i çmimeve ka arritur në 101.7 pikë.

Pavarësisht kësaj ngritjeje, inflacioni bazë ka mbetur i pandryshuar në 0.5 për qind, duke mos përfshirë energjinë, karburantet dhe produktet e freskëta e sezonale. Treguesi vazhdon të mbetet brenda kufirit prej 0 për qind deri në 2 për qind, të cilin Banka Kombëtare e Zvicrës e konsideron në përputhje me stabilitetin e çmimeve. Në fillim të vitit 2026, inflacioni në vend ishte afër zeros, ndërsa mesatarja vjetore për vitin 2025 ishte vetëm 0.2 për qind.