Importi i Kosovës kalon 6.3 miliardë euro për dhjetë muaj

Gjatë periudhës janar–tetor, Kosova ka importuar mallra në vlerë prej mbi 6.3 miliardë eurosh, duke shënuar një rritje prej 8.5% krahasuar me 5.81 miliardë eurot e periudhës së njëjtë të vitit paraprak, sipas të dhënave zyrtare të Doganës së Kosovës. Eksportet arritën në 960 milionë euro, që përbën një rritje prej 23.9% nga 774.8 milionë euro sa ishin në dhjetë muajt e parë të vitit 2025, ndonëse diferenca mbetet e lartë dhe deficiti tregtar u ngjit në 5.34 miliardë euro nga 5.04 miliardë euro që ishte një vit më parë.

Të dhënat mujore dëshmojnë se korriku shënoi importin më të lartë me 716.7 milionë euro, i ndjekur nga tetori me 694.9 milionë euro dhe qershori me 676.3 milionë euro, ndërsa eksporti më i lartë u regjistrua në tetor me 124.2 milionë euro. Kina kryeson listën e vendeve të origjinës për importet me 879.4 milionë euro, duke kaluar Gjermaninë e cila renditet e dyta me 838.6 milionë euro, e pasuar nga Turqia me 740.3 milionë euro, Italia me 354.9 milionë euro, Maqedonia e Veriut me 314.4 milionë euro, Greqia me 309.5 milionë euro, Polonia me 242.1 milionë euro, Shtetet e Bashkuara të Amerikës me 240.9 milionë euro, Shqipëria me 225.2 milionë euro dhe Serbia me 195.3 milionë euro.

Në anën tjetër, eksportet e vendit vazhdojnë të orientohen nga tregjet rajonale, ku Shqipëria mbetet destinacioni kryesor me 182 milionë euro, e ndjekur nga Maqedonia e Veriut me 148.6 milionë euro, Gjermania me 94.4 milionë euro, Zvicra me 92.2 milionë euro, Serbia me 61.4 milionë euro, Mali i Zi me 50.6 milionë euro, Turqia me 36.4 milionë euro, Italia me 31.4 milionë euro, Holanda me 28.3 milionë euro dhe Bullgaria me 21.8 milionë euro. Vetëm Shqipëria dhe Maqedonia e Veriut përbërnë rreth 34.4% të vlerës së përgjithshme të eksporteve, kurse Kina, Gjermania dhe Turqia zënë rreth 39% të importeve, ndërkohë që gjatë gjithë vitit të kaluar importet kishin arritur nivelin rekord prej 7.11 miliardë eurosh.