Gëllçi: Përse po protestohet anë e kënd Europës këtë vjeshtë

Këtë vjeshtë rrugët e shteteve europiane nga Parisi në Tiranë janë mbushur me qytetarë që kërkojnë ndryshime për çmimet, pagat, arsimin dhe korrupsionin, ku sipas të dhënave të organizatës ACLED vetëm Franca regjistroi mbi 1,200 protesta nga 15 shtatori deri më 30 tetor.

Vala e pakënaqësisë sociale ka përfshirë prej muajsh disa shtete të kontinentit, ku arsyet e revoltës ndryshojnë nga një vend në tjetrin, duke përfshirë Spanjën, Italinë, Gjermaninë, Portugalinë, Belgjikën dhe Irlandën. Sipas të dhënave të ACLED, Spanja numëroi 173 protesta, Italia 160, Gjermania 70 dhe Portugalia 33 gjatë periudhës nga 15 shtatori deri më 30 tetor.

Në Francë, sipas shifrave të Ministrisë së Brendshme të publikuara më 5 nëntor, u numëruan rreth 575 mijë protestues në gjithë vendin, ndërsa sindikatat pretenduan se numri arriti në 1.6 milion, pas nisjes së pakënaqësive nga shkollat dhe përfshirjes së sindikatave, punonjësve të transportit, mjekëve, infermierëve dhe pensionistëve. Në Spanjë dhe Portugali, sipas burimeve, qiratë dhe çmimet e banesave janë bërë të papërballueshme për të rinjtë. Në Itali, punëtorët protestojnë për pagat, kontratat e pasigurta dhe faturat e përditshme, ndërsa në Belgjikë kundërshtohen ndryshimet në politikat sociale dhe shkurtimet e shpenzimeve publike. Më 21 tetor, mësues, nxënës dhe studentë dolën në Athinë, Selanik e qytete të tjera të Greqisë për financimin e arsimit dhe gjendjen e shkollave, kurse në Dublin sindikatat protestuan për koston e jetesës dhe krizën e banesave, kurse në Gjermani shqetësimet ekonomike u bashkuan me pasigurinë për arsimin dhe punën.

Ngjarja që transformoi skenën e protestave në Serbi nisi në nëntor 2024 në Novi Sad, ku pas shembjes së strehëzës së stacionit hekurudhor vdiqën 16 njerëz, ngjarje kjo që u lidh nga qytetarët me korrupsionin. Studentët serbë krijuan Listën Studentore dhe dolën në zgjedhjet e parakohshme të 25 tetorit, ku dolën fitues duke kaluar nga sheshi në parlament. Ndërkohë, në Shqipëri, Revolucioni Flamingo nisi në fund të majit kundër një kompleksi turistik luksoz në Zvërnec të Vjosë-Nartës, duke u zgjeruar më pas me kërkesa për transparencë, hetim për korrupsion dhe dorëheqjen e kryeministrit Edi Rama, ndërsa në tetor u bashkuan edhe nxënësit e studentët për tarifat dhe gjendjen e shkollave.