Ilir Kulla: Rama ka humbur ndikimin te shqiptarët në Kosovë dhe Maqedoni

Analisti Ilir Kulla, i ftuar në emisionin “Zonë e Lirë” në News24, foli për zhvillimet politike në Ballkanin Perëndimor dhe pozicionin e kryeministrit Edi Rama në rajon. Sipas Kullës, kryeministri shqiptar nuk ka më ndikimin që kishte dikur te shqiptarët në Kosovë dhe Maqedoninë e Veriut, gjë që ka ulur ndjeshëm peshën dhe rolin e tij në politikën rajonale. Gjatë kësaj interviste, situata e kreut të qeverisë shqiptare u krahasua me atë të Aleksandër Vuçiçit, duke u vënë në dukje se, ashtu si ky i fundit ka bashkuar kundër vetes disa faktorë, edhe Rama ka përballë shumë aktorë politikë që janë bërë bashkë kundër tij.

Kulla kujtoi se në fillimet e angazhimit të tij rajonal, Rama u paraqit si një faktor që mund të kontribuonte për stabilitetin në Ballkan, por për ta përmbushur këtë rol ai kishte nevojë për ndikim te politikanët shqiptarë në vendet fqinje. Si zhvillime kryesore që ia kanë dobësuar pozitat dhe e kanë lënë pa instrumente politike, analisti renditi kundërshtimin e Kosovës ndaj ndryshimit të kufijve, dështimin e nismës “Ballkani i Hapur” si dhe largimin e Dritan Abazoviçit nga pushteti në Mal të Zi. Ai theksoi se Lëvizja Vetëvendosje në Kosovë dhe koalicioni VLEN në Maqedoninë e Veriut, të cilët qeverisin sot së bashku me Hristijan Mickoskin, nuk ia njohin lidershipin dhe se Rama nuk ka më se çfarë t'u ofrojë në këmbim. Sipas tij, shqiptarët e rajonit nuk e pranuan, ndërsa i vetmi argument i mbetur për stabilitet vështirësohet nga protestat e brendshme dhe problemet e brendshme me të cilat përballet kryeministri.

«Vuçiç i bashkoi të gjithë kundër vetes, sikurse Rama në Shqipëri ka bërë që faktorët të bashkohen kundër tij. Mendoj se Rama doli nga loja kur humbi ndikimin te shqiptarët e Maqedonisë së Veriut dhe të Kosovës. Në Maqedoni, me ardhjen në pushtet të forcave që sot qeverisin me Mickoswkin, pra VLEN-it, dhe në Kosovë me pushtetin e Albin Kurtit, këta nuk ia njohin lidershipin dhe Rama nuk ka çfarë t’u ofrojë në këmbim. Në fillim, Rama shihej si njeriu që do të sillte stabilitet, por për ta bërë këtë duhej të kishte ndikim te këta aktorë. Kosova ishte kundër ndryshimit të kufijve, ndërsa “Ballkani i Hapur” dështoi. Kartat që Rama kishte për të luajtur në tavolinë nuk i ka më, jo sepse iku Vuçiçi, por sepse shqiptarët e rajonit nuk e pranuan. U largua edhe Dritan Abazoviçi nga pushteti në Mal të Zi dhe sot Rama nuk ka çfarë të ofrojë. I vetmi argument që mund të paraqesë është stabiliteti, por këtë e ka të vështirë për shkak të protestave të brendshme. Në raport me Perëndimin, Rama nuk ka më çfarë të ofrojë për Ballkanin. Nuk ka në dorë as çështjen e Kosovës, as atë të Maqedonisë së Veriut dhe përballet me probleme të brendshme. Vetëvendosje dhe VLEN-i nuk janë nën ndikimin e Ramës», u shpreh Kulla.