Këshilli Komunal miraton rregullimin e çmimit të ujit në Tetovë

TETOVË — Me vendim të Këshillit Komunal, në Tetovë është miratuar rregullimi i çmimit të ujit, i cili do të pësojë një ngritje prej rreth dy denarësh brenda tre viteve të ardhshme. Drejtori i Ndërmarrjes Publike Komunale «Sharri», Valon Zeqiri, ka bërë të ditur se pavarësisht propozimit të Komisionit Rregullator për një çmim mesatar prej 24 denarësh, bordi ka vendosur të zbatojë tarifën minimale prej rreth 22 denarësh për të mbrojtur buxhetin familjar të qytetarëve.

Sipas përllogaritjeve nga ndërmarrja, kjo ndërhyrje do të sjellë një ndryshim financiar prej rreth 40 denarësh në muaj për faturat e familjeve tetovare. «Një qytetar i cili harxhon diku te 21 kubik në muaj, në qoftë se ka paguar 400-420 denarë, do të duhet të paguajë diku te 460 deri në 470 denarë maksimum», theksoi Zeqiri, duke shtuar se krahasuar me qytete të tjera si Ohri ku metri kub arrit në 70 denarë, Tetova mban çmimin më të lirë në nivel republikan me 22.5 denarë për metër kub.

Aktualisht, furnizimi i qytetit mbështetet në një sasi prej rreth 320 litrash në sekondë, e cila vlerësohet e mjaftueshme për këtë periudhë kur mungojnë mërgimtarët. Ndërkohë, autoritetet komunale presin që reshjet e paralajmëruara të shiut gjatë ditëve në vijim të ndihmojnë në përmirësimin e mëtejshëm dhe stabilizimin e furnizimit të rregullt me ujë të pijshëm.