Maqedonci në Konferencën e Sigurisë në Berlin diskuton për ndërhyrjet ruse

Ministri i Mbrojtjes i Kosovës, Ejup Maqedonci, mori pjesë në Konferencën e Sigurisë në Berlin (Berlin Security Conference) ku u mblodhën përfaqësues të lartë politikë, diplomatikë dhe ushtarakë. Maqedonci u ftua si panelist në debatin e nivelit të lartë me temën «Parandalimi përmes vigjilencës: Si të frenohet ndërhyrja ruse?», ku diskutoi krah përfaqësuesve të NATO-s dhe Gjermanisë mbi sfidat aktuale të sigurisë evropiane dhe ndikimin rus.

Gjatë këtij paneli, palët trajtuan rëndësinë e koordinimit, vigjilencës dhe bashkëpunimit ndërkombëtar për ruajtjen e paqes e stabilitetit në Evropë. Maqedonci theksoi se «Republika e Kosovës mbetet e përkushtuar ndaj forcimit të kapaciteteve të saj mbrojtëse dhe kontributit aktiv në sigurinë rajonale dhe ndërkombëtare, në bashkëpunim të ngushtë me partnerët tanë strategjikë».