IKD kërkon penalizimin e abuzimit me paratë shtetërore në fushata
Peticioni i nisur synon gjithashtu që edhe moszbatimi i aktgjykimeve të Gjykatës Kushtetuese të sanksionohet si vepër e re penale në Kosovë.
PRISHTINË — Instituti i Kosovës për Drejtësi (IKD) ka nisur një iniciativë ligjore për ndryshimin e Kodit Penal të Kosovës, duke kërkuar që përdorimi i parasë publike gjatë fushatave zgjedhore të sanksionohet si vepër penale. Ky propozim synon të parandalojë abuzimin me fondet shtetërore nga zyrtarët gjatë periudhave zgjedhore.
Përveç kësaj, nisma legjislative e IKD-së kërkon që edhe moszbatimi i qëllimshëm i aktgjykimeve të Gjykatës Kushtetuese të cilësohet si vepër e re penale. Naim Jakaj nga IKD deklaroi se kjo iniciativë bazohet në të drejtën e qytetarëve për të propozuar ndryshime ligjore përmes mbledhjes së së paku 10 mijë nënshkrimeve.
Sipas institucionit, ekzistojnë rreth dhjetë aktgjykime të Kushtetueses të cilat nuk janë zbatuar. Ndryshe nga gjykatat e rregullta, mungesa e ndëshkimit për moszbatimin e aktgjykimeve të Kushtetueses bën që zyrtarët të mos mbajnë përgjegjësi ligjore.
Përmes kësaj nisme, synohet që institucionet dhe zyrtarët të mbajnë përgjegjësi më të madhe për respektimin e vendimeve të drejtësisë. Peticioni do të kërkojë mbështetjen e gjerë qytetare për të dërguar propozimin në Kuvend.
Burim: Klan Kosova
— Redaksia ZHURMA