Hykmete Bajrami kërkon hetim nga Prokuroria për tenderët njëburimorë

Deputetja e Lidhjes Demokratike të Kosovës, Hykmete Bajrami, ka kërkuar nga Prokuroria Speciale që të hetojë rreth tre mijë kontrata njëburimore, të cilat sipas saj janë shndërruar në praktikë qeverisëse. Nëpërmjet një postimi në rrjetin social Facebook, ajo ka theksuar se këto kontrata nuk përbëjnë përjashtim dhe se bashkë me to është rritur edhe korrupsioni, duke përsëritur thirrjen e saj për hetimin e çmimeve, procedurave të negociuara dhe përfituesve.

Si ilustrim për pasojat e mungesës së konkurrencës, ajo ka përmendur rastin e Komunës së Podujevës, e cila përmes një tenderi të negociuar ka kontraktuar peletin për 120 euro më shtrenjtë për ton krahasuar me Komunën e Rahovecit, e cila kishte zhvilluar procedurë të hapur tenderimi.

Siç raportoi Zhurma më 12 tetor 2026, deputetja e Lidhjes Demokratike të Kosovës ka qenë kritike edhe më parë ndaj ekzekutivit lidhur me fushën e menaxhimit financiar dhe nivelin e ulët të realizimit të investimeve kapitale.