Hykmete Bajrami kritikon qeverinë për investimet kapitale

Deputetja e Lidhjes Demokratike të Kosovës (LDK), Hykmete Bajrami, ka kritikuar qeverinë për nivelin e ulët të realizimit të investimeve kapitale, duke u referuar të dhënave të Ministrisë së Financave. Sipas saj, nga rreth një miliard euro të planifikuara për vitin 2026, deri më 1 shtator niveli qendror ka shpenzuar vetëm 192 milionë euro.

Bajrami ka bërë të ditur se, gjatë së njëjtës periudhë, për subvencione dhe transfere janë shpenzuar 908 milionë euro nga 1.3 miliardë euro të planifikuara. Ajo ka vlerësuar se qeveria mbështetet te të hyrat e sektorit privat ndërkohë që investimet publike mbeten prapa, duke shtuar se varfëria nuk luftohet vetëm duke shpërndarë para, por duke krijuar zhvillim dhe punësim.

Sipas të dhënave të bëra publike, komunat, megjithëse marrin rreth 20 për qind të buxhetit të përgjithshëm, kanë realizuar 137 milionë euro investime kapitale deri më 1 shtator.