Hoti: Asnjë vendim s'ka hequr statusin e dëshmorit të Krasniqit e Aganit

Ministri për Punë, Familje dhe Vlerat e Luftës Çlirimtare, Andin Hoti, ka mohuar raportimet se Qeveria i ka hequr statusin e dëshmorit Fehmi Aganit, Ahmet Krasniqit, Enver Malokut, Bajram Kelmendit dhe personaliteteve të tjera. Ai deklaroi se as Ministria dhe as ekzekutivi nuk kanë marrë ndonjë vendim të tillë.

Hoti tha se «Komisioni Qeveritar për Njohjen dhe Verifikimin e Statusit e ka përfunduar punën para shumë vitesh dhe nuk ekziston më si mekanizëm funksional». Sipas tij, personat e përmendur gëzojnë statusin dhe të drejtat pensionale sipas ligjit, ndërsa kritikoi mediat për dezinformim dhe mungesë të kërkimit të sqarimit paraprak.