Hoti kërkon nga presidentja mosdekretimin e Nurbojës në BQK

Deputeti i Lidhjes Demokratike të Kosovës, Avdullah Hoti, ka bërë të ditur se së bashku me 14 deputetë të tjerë nga grupet parlamentare të opozitës, kanë dorëzuar një shkresë te presidentja e Kosovës. Përmes kësaj kërkese, deputetët e opozitës i kanë kërkuar kreut të shtetit që të refuzojë dekretimin e Bashkim Nurbojës në Bordin e Bankës Qendrore të Kosovës, ku ai ishte zgjedhur nga Kuvendi më 15 tetor si anëtar joekzekutiv.

Në njoftimin e tij, deputeti Hoti ka theksuar nevojën e respektimit të procedurave dhe ruajtjes së pavarësisë institucionale. «Tani mbetet që Presidentja t’i përmbahet kompetencave të saj kushtetuese dhe të veprojë në përputhje me përgjegjësinë që i jep Kushtetuta. Pavarësia e institucioneve dhe respektimi i procedurave kushtetuese duhet të jenë mbi çdo interes tjetër», ka shkruar Hoti.