Haxhiu kërkon konsensus mes LVV-së dhe LDK-së për presidentin
Haxhiu e quan “lajm të mirë” përfundimin e Kuvendit të Jashtëzakonshëm të LDK-së dhe kërkon vazhdimin e takimeve me LVV-në.
PRISHTINË — Kryetarja e Kuvendit të Kosovës, Albulena Haxhiu, kërkoi “përpjekje maksimale dhe seriozitet” për të arritur një marrëveshje rreth zgjedhjes së presidentit apo presidentes së vendit. Deklarata erdhi në konferencë për media, pas takimit me përfaqësuesit e subjekteve parlamentare të legjislaturës së 11-të të Kuvendit, transmeton klankosova.tv.
Haxhiu e cilësoi “lajm të mirë” përfundimin e Kuvendit të Jashtëzakonshëm të LDK-së, pas thirrjes së Abdixhikut për bashkimin e radhëve, duke shtuar se takimet mes LVV-së dhe LDK-së duhet të vazhdojnë për një konsensus të përbashkët. Ato ishin pezulluar deri në sqarimin e situatës brenda LDK-së.
“Është shumë e rëndësishme që takimet të vazhdojnë, ato të thirren dhe të mbahen, dhe të ketë përpjekje maksimale dhe seriozitet që të kemi një marrëveshje me të cilën arrijmë të kemi një konsensus për zgjedhjen e presidentit apo presidentes së vendit,” tha Haxhiu.
Kush do të jetë kryetar i ri i Kuvendit ende nuk është caktuar. Haxhiu tha se është e bindur se para 6 gushtit do të dihet propozimi i Lëvizjes Vetëvendosje për këtë post, meqë vendimi i takon vetëm LVV-së.
Burim: Tetova Sot
— Redaksia ZHURMA