Haxhiu dhe Konjufca presin në takime lamtumirëse ambasadoren e Greqisë

Kryetarja e Kuvendit të Republikës së Kosovës, Albulena Haxhiu, ka pritur në takim lamtumirës Shefen e Zyrës Ndërlidhëse të Greqisë në Kosovë, Ambasadoren Heleni Vakali. Gjatë takimit, Haxhiu e falënderoi atë për bashkëpunimin dhe përkushtimin gjatë shërbimit në Kosovë, duke i uruar suksese në angazhimet e ardhshme, ndërsa u shpreh vullneti për të thelluar bashkëpunimin dhe për të avancuar marrëdhëniet ndërmjet dy vendeve.

Në anën tjetër, zëvendëskryeministri i Parë dhe Ministri i Punëve të Jashtme dhe Diasporës, Glauk Konjufca, gjithashtu ka pritur në takim lamtumirës ambasadoren Heleni Vakali. Ai e falënderoi atë për angazhimin dhe bashkëpunimin konstruktiv gjatë mandatit, duke vlerësuar kontributin në afrimin dhe forcimin e lidhjeve mes dy vendeve.