Egnatia hedh poshtë zërat për shtyrjen e ndeshjes

Klubi i Egnatias ka sqaruar se përballja kundër skuadrës së Midtjylland në raundin e parë të Conference League do të luhet normalisht, duke hedhur poshtë çdo spekulim për shtyrje. Sfida është caktuar të zhvillohet në stadiumin “Air Albania”, ndërsa starti i saj do t'i korrespondojë orës 18:45.

Nëpërmjet një komunikimi zyrtar, drejtuesit e klubit bënë të ditur se stërvitja e parashikuar për t'u mbajtur nuk u realizua për shkak të zhvillimeve dhe protestave në kryeqytet. Pavarësisht kësaj situate, organizimi i ndeshjes mbetet i paprekur dhe skuadra do të presë në fushë ekipin nga Danimarka. Ky takim përbën një moment historik dhe paraqitjen e parë të rrogozhinasve në një fazë të tillë evropiane.