Haradinaj: Blloku B1 i KEK-ut hap rrugë për mafinë energjetike

Daut Haradinaj ka deklaruar se Blloku B1 i Korporatës Energjetike të Kosovës nuk pritet të rikthehet në funksion as në fund të këtij viti, duke paralajmëruar se vendi do të detyrohet të blejë rrymë nga jashtë. Gjatë një paraqitjeje, ai u shpreh se projekti për riparimin e kësaj njësie nuk ka përparuar dhe se kjo situatë do t'i përfitojë tregtarët e energjisë, ndërsa koston do ta bartin qytetarët. «Kështu që Kosova do të blejë rrymë dhe kryesisht është lajm i mirë për ata që e kemi quajtur mafi energjetike ballkanike, se i kanë fërkuar duart që do t’i shesin Kosovës rrymë edhe për 200-300 milionë euro shtesë dhe qytetari i Kosovës do ta paguajë», ka thënë Haradinaj.

Nga ana tjetër, ministrja e Ekonomisë, Artane Rizvanolli, ka pranuar se njësia në fjalë nuk do të rikthehet në funksion brenda afatit të paraparë. Sipas saj, përgjegjësia për vonesat i takon kontraktorit, ndërsa Bashkimi Evropian figuron si autoriteti kontraktues dhe financues i projektit. Duke specifikuar se afati kontraktual ishte 25 nëntori, ajo ka kërkuar nga autoritetet përgjegjëse dhe kompania mbikëqyrëse ndërmarrjen e masave për përfundimin sa më të shpejtë të punimeve.