Hamza: Agresori ishte Serbia, viktima ishte Kosova

Kryetari i Partisë Demokratike të Kosovës, Bedri Hamza, ka reaguar pas aktgjykimit të Dhomave të Specializuara të Kosovës në Hagë ndaj Hashim Thaçit, Kadri Veselit, Jakup Krasniqit dhe Rexhep Selimit. Ai e cilësoi vendimin si “të padrejtë dhe të papranueshëm” dhe theksoi se PDK-ja e kundërshton atë.

Sipas Hamzës, aktgjykimi u bazua në pretendime dhe materiale që PDK-ja i konsideron të fabrikuara, të cilat, sipas tij, janë përdorur ndër vite nga Serbia për ta kriminalizuar luftën e UÇK-së. Ai vlerësoi se lufta e UÇK-së ishte “e drejtë, mbrojtëse dhe çlirimtare”, ndërsa përgjegjësinë për luftën dhe krimet ndaj shqiptarëve të Kosovës ia atribuoi regjimit të Serbisë.

Në reagimin e tij, Hamza shkroi se “sot në Hagë u godit rëndë e drejta e popullit tonë që luftoi për liri, mbijetesë dhe çlirim nga regjimi shtetëror serb që vrau, dëboi dhe terrorizoi shqiptarët e Kosovës”.

Edhe organizata Albanians for America shprehu shqetësim të thellë dhe zhgënjim ndaj aktgjykimit, duke e quajtur të padrejtë për ata që luftuan për çlirimin e Kosovës. AFA theksoi se UÇK-ja u krijua në kushtet e represionit dhe dhunës së regjimit serb, në një kohë kur shqiptarët e Kosovës përballeshin me vrasje, dëbime, shkatërrime dhe krime të rënda, dhe se kjo e vërtetë historike nuk mund të zhbëhet.

Sipas AFA-së, aktgjykimi nuk duhet të përdoret për të vënë në bankën e të akuzuarve përpjekjen e një populli për liri, as të krijojë barazi morale apo historike mes luftës çlirimtare të Kosovës dhe aparatit shtetëror serb. Organizata vuri në dukje se vendimi është i shkallës së parë dhe se palët mund ta kundërshtojnë përpara Panelit të Apelit, prandaj procesi gjyqësor mbetet i hapur.