Granti gjerman për ndërmarrjen “Pastrimi” dështon sipas Përparim Ramës

Sipas njoftimit të bërë nga i pari i Prishtinës, ndihma financiare e Qeverisë së Gjermanisë përmes Bankës Gjermane për Zhvillim (KfW) për Kompaninë Rajonale të Mbeturinave “Pastrimi” nuk ka arritur të realizohet. Përparim Rama ka akuzuar ministrin në detyrë të Financave, Hekuran Murati, se ka lënë pa nënshkruar Marrëveshjen e Financimit, duke bërë që ky projekt i rëndësishëm ndërkombëtar të dështojë.

Duke e cilësuar situatën si të rëndë dhe të turpshme përballë partnerëve ndërkombëtarë, kreu i komunës ka bërë të ditur se institucioni që ai udhëheq nuk do të presë më tutje dhe do të veprojë menjëherë. Gjatë seancës së radhës të Kuvendit të Kryeqytetit, ai paralajmëroi marrjen e vendimit për themelimin e një ndërmarrjeje komunale, me qëllim që çështja e mbeturinave të gjejë zgjidhje përmes kompetencave lokale.