Gjykata e Lartë rrëzon aktgjykimet për zjarrin në spitalin modular në Tetovë

TETOVË — Gjykata e Lartë ka shfuqizuar aktgjykimet për tragjedinë e 8 shtatorit 2021 në spitalin modular në Tetovë, ku humbën jetën 14 persona, duke e kthyer lëndën në rigjykim për shkak të mangësive serioze në vendimet e mëparshme gjyqësore.

Tragjedia në spitalin modular ndodhi gjatë muajit shtator të vitit 2021, kur objekti u përfshi nga flakët dhe u dogj tërësisht, duke shkaktuar vdekjen e 14 personave. Pas hetimeve dhe procesit gjyqësor, Gjykata Themelore e Tetovës kishte shpallur aktgjykimin e saj më 16 maj 2025, ndërsa Gjykata e Apelit në Gostivar kishte marrë vendimin e shkallës së dytë më 26 nëntor 2025, përmes të cilit dy ish-drejtorët ishin dënuar me nga tre vjet burg.

Vendimi i fundit i Gjykatës së Lartë u mor më 22 tetor dhe u bë publik së fundmi, pasi u pranuaran kërkesat për rishqyrtim të jashtëzakonshëm të paraqitura nga ish-drejtorët e Spitalit Klinik të Tetovës, Florin Besimi dhe Artan Etemi, sipas njoftimeve zyrtare të institucioneve. Me këtë vendim janë shfuqizuar si aktgjykimi i shkallës së parë ashtu edhe ai i shkallës së dytë, ku dy ish-drejtorët ishin dënuar për veprën penale “Vepra të rënda kundër sigurisë së përgjithshme”. Sipas vlerësimit të Gjykatës së Lartë, gjykatat më të ulëta nuk kanë shpjeguar mjaftueshëm bazën e provave për të arritur në përfundimin se të akuzuarit kanë vepruar si bashkëkryerës, dhe nuk kanë sqaruar nëse mungesa e pajisjeve ka shkaktuar shpërthimin apo vetëm përhapjen e flakëve. Gjykata e Lartë ka konstatuar gjithashtu se në vendimet e mëparshme nuk janë shqyrtuar si duhet ekspertizat e ndryshme, përfshirë atë për qarkun e shkurtër elektrik nga kablloja e defibrilatorit gjatë reanimimit të një pacienti, si dhe ekspertizën gjermane që tregonte se zjarri kishte shpërthyer pranë njërit prej shtretërve dhe ishte ndihmuar nga përqendrimi i lartë i oksigjenit dhe materialet e ndezshme. Njëkohësisht, Gjykata e Lartë ka hedhur poshtë si të palejuar kërkesën për rishqyrtim të jashtëzakonshëm të paraqitur nga vetë Spitali Klinik i Tetovës, pasi ky institucion nuk i plotësonte kushtet ligjore.

Për sa i përket rrjedhës së mëtejshme të procedurës, lënda i është kthyer sërish Gjykatës Themelore të Tetovës, e cila do të duhet të zhvillojë rigjykimin nga fillimi, të trajtojë çështjet kontestuese dhe të marrë një vendim të ri bazuar në udhëzimet e dhëna nga Gjykata e Lartë.

Në arsyetimet e publikuara lidhur me këtë çështje, Gjykata e Lartë thekson se vendimi i saj nuk nënkupton shpalljen e pafajshëm të dy ish-drejtorëve, por kërkon një vlerësim më të drejtë dhe më të plotë të provave dhe të lidhjes shkak-pasojë.