GJKKO sekuestron mbi 128.4 milionë euro pasuri të rrjetit të kokainës

TIRANË — Gjykata e Posaçme për Korrupsionin dhe Krimin e Organizuar ka caktuar masën e sigurimit "Arrest në burg" për 15 shtetas dhe "Arrest në shtëpi" për 5 të tjerë, pas një hetimi të gjerë të SPAK. Operacioni goditi një rrjet të trafikut ndërkombëtar të kokainës dhe pastrimit të parave.

Sipas njoftimit zyrtar të prokurorisë, procedimi penal i vitit 2021 ka dokumentuar veprimtarinë e një grupi kriminal që operonte në disa shtete të Europës dhe në Amerikën Latine. Gjatë operacionit janë kryer mbi 50 kontrolle në banesa, zyra dhe shoqëri tregtare.

Hetimet e SPAK tregojnë se shtetasit A.H. dhe L.K. kishin rol drejtues në organizimin e trafikut të kokainës nga Amerika Latine drejt Belgjikës, Spanjës dhe Holandës. Rrjeti kriminal siguronte, transportonte dhe përpunonte kimikisht lëndën narkotike për t'i shpërndarë në tregjet europiane.

Prokuroria ka siguruar prova përmes përgjimeve telefonike dhe analizës së komunikimeve në platformën SKY ECC. Këto komunikime zbuluan koordinimin për menaxhimin e laboratorëve dhe transportin e ngarkesave. Gjatë hetimeve në Barcelonë u sekuestruan 441 kilogramë kokainë, ndërsa sasi të tjera u kapën në Itali e Holandë.

Paralelisht me hetimet për trafikun e drogës, grupi kriminal dyshohet se ka kryer pastrim të produkteve të veprës penale. Shtetasit A.R., E.M., E.R., A.H., A.Z., L.K., O.B. dhe O.S. dyshohet se kanë investuar të ardhura kriminale në pasuri të paluajtshme dhe shoqëri tregtare.

Investimet e dyshuara janë shtrirë kryesisht në projekte ndërtimi dhe prona në Tiranë, Palasë, Himarë dhe zona të tjera bregdetare. Për të fshehur origjinën e pasurive, anëtarët e rrjetit dyshohet se kanë qarkulluar fondet e tyre përmes kompanive të ndryshme tregtare.

Në përfundim, Gjykata e Posaçme ka vendosur sekuestro preventive mbi pasuri që arrijnë vlerën e mbi 128.4 milionë eurove. Këto sekuestro përfshijnë kontratat e shitjes të lidhura nga shtetasit A.Sh., F.S. dhe B.S. me kompaninë "A...L...D...sh.a.", si pjesë e skemës së pastrimit.

Burim: ATSH
— Redaksia ZHURMA