GJKKO: Majlinda Bufi e pafajshme për krim zgjedhor

TIRANË — GJKKO shpalli të pafajshme Majlinda Bufin, kryebashkiaken e Roskovecit, të akuzuar nga SPAK për "Përdorimin e funksionit publik për veprimtari politike ose zgjedhore." "Nuk provohet se e ka kryer veprën penale," deklaroi gjyqtarja Irena Gjoka.

SPAK kishte kërkuar dënimin e Bufit me 1 vit e 6 muaj burg, me mundësi konvertimi në shërbim prove për 2 vjet. Bufi u hetua dhe u gjykua në gjendje të lirë, duke kundërshtuar çdo akuzë: pretendoi se nuk ushtroi presion apo ndikim mbi asnjë votues.

Hetimi nisi pas një denoncimi të publikuar në media, ku pretendohej se kryebashkiakja i kishte kërkuar një qytetari të mos merrte pjesë në zgjedhjet vendore të 14 majit 2023 dhe të mos përfshihej në aktivitetet e forcave të tjera politike. Bufi i kundërshtoi vazhdimisht këto pretendime dhe u deklarua e pafajshme.

Me vendimin e sotëm, GJKKO i dha të drejtë Bufit — hetimi i SPAK-ut nuk mjaftoi të provojë veprën penale para gjykatës.

Burim: Opinion
— Redaksia ZHURMA