Gjini: Raporti i NDI-së dëshmon përkeqësim të gjendjes në Kosovë
Kryetari i Aleancës thotë se plani i tij me gjashtë pika synon investime në energji dhe lehtësime tatimore.
PRISHTINË — Kryetari i Aleancës, Ardian Gjini, tha se gjetjet e raportit të fundit të NDI-së dëshmojnë përkeqësim të gjendjes në Kosovë dhe nevojën për ndryshim politik. Sipas tij, rritja e qytetarëve që besojnë se vendi po shkon në drejtim të gabuar, si dhe dëshira për emigrim, janë sinjale alarmuese.
Sipas Gjinit, shqetësimet kryesore të qytetarëve mbeten çmimet e larta, faturat e energjisë, papunësia dhe korrupsioni. Ai thotë se këto probleme po e thellojnë pakënaqësinë e përditshme dhe po ushqejnë tendencën për largim nga vendi, siç e ka konfirmuar edhe vetë raporti i organizatës amerikane.
Për të adresuar situatën, Gjini thotë se Aleanca ofron një program me gjashtë pika, që përfshin investime në energji, lehtësime tatimore dhe masa për zhvillim ekonomik. Sipas tij, qëllimi është përmirësimi i standardit të jetesës dhe krijimi i kushteve që qytetarët të ndërtojnë të ardhmen e tyre në Kosovë.
Burim: Gazeta Metro
— Redaksia ZHURMA