Sondazhi i NDI-së: 28% e kosovarëve duan të largohen
Sipas sondazhit të NDI-së, kostoja e lartë e jetesës dhe çmimet e energjisë mbeten shqetësimet kryesore për të anketuarit.
PRISHTINË — Sondazhi i ri i NDI-së tregon se 38 për qind e qytetarëve në Kosovë besojnë se vendi po shkon në drejtim të gabuar. Po ashtu, dëshira për emigrim është rritur në 28 për qind krahasuar me fundin e vitit 2024, me tendencë më të theksuar te të rinjtë.
Ky hulumtim i realizuar me 1,200 qytetarë nxjerr në pah se shqetësimet kryesore të popullsisë lidhen me koston e lartë të jetesës, çmimet e energjisë dhe papunësinë. Vetëm 31 për qind e të anketuarve vlerësojnë se Kosova po ecën aktualisht në drejtimin e duhur.
Nga të anketuarit, 62 për qind thonë se do të qëndronin në Kosovë, ndërsa ata që do të shpërnguleshin po të kishin mundësi janë rritur nga 16 në 28 për qind. Te grupmosha 18–24 vjeç, dëshira për emigrim arrin shkallën prej 44 për qind.
Shtrenjtimi i mallrave shihet si problemi më i madh për vitin e ardhshëm nga 56.6 për qind e të anketuarve. Kjo vështirësi konfirmohet edhe te buxheti familjar, ku 62.3 për qind e deklarojnë të papërballueshme pagesën e faturave të shërbimeve publike.
Në prioritetet specifike shëndetësore, 58.3 për qind e qytetarëve kërkojnë sigurimin shëndetësor si çështjen më të rëndësishme. Kurse për sa i përket besueshmërisë institucionale, Forca e Sigurisë së Kosovës prin me 95 për qind, e pasuar nga Policia e Kosovës me 93 për qind.
Partitë politike renditen të fundit në listë, me vetëm 40 për qind të besimit, ndërsa Qeveria gëzon 53 për qind. Në marrëdhëniet ndërkombëtare, Shtetet e Bashkuara të Amerikës vlerësohen më së larti me notën 4.70, të ndjekura nga aleanca e NATO-s me 4.68.
Ndonëse pakënaqësitë ekonomike janë të larta, 75.3 për qind e të anketuarve deklarojnë se demokracia është gjithmonë e preferueshme ndaj formave të tjera të qeverisjes. Për më tepër, korrupsioni cilësohet si kërcënimi kryesor ndaj demokracisë nga 41.1 për qind e tyre.
Burim: BalkanWeb
— Redaksia ZHURMA