Gjermania planifikon ta përgjysmojë kuotën për punëtorët nga rajoni

Qeveria gjermane synon që nga janari i vitit 2027 ta përgjysmojë kuotën vjetore për punëtorët nga Ballkani Perëndimor, nga 50 mijë në 25 mijë persona, duke prekur kështu edhe qytetarët nga Kosova. Sipas të dhënave të Agjencisë Federale të Punësimit në Gjermani, rreth 546 mijë shtetas nga vendet e rajonit janë të punësuar me sigurime shoqërore, ndërsa numri i tyre është rritur për rreth 170 mijë gjatë pesë viteve të fundit.

Rregullorja për Ballkanin Perëndimor, e cila mundëson viza pune përmes procedurave të lehtësuara, është në fuqi që nga viti 2016 për shtetasit e Kosovës, Shqipërisë, Bosnjë-Hercegovinës, Maqedonisë së Veriut, Malit të Zi dhe Serbisë. Të dhënat e Agjencisë Federale të Punësimit tregojnë se rreth 287 mijë persona ose 53 për qind e të punësuarve nga rajoni punojnë në pozita që kërkojnë së paku nivelin e një punëtori të kualifikuar, kurse 45 për qind e këtij grupi janë në profesione me mungesë të fuqisë punëtore në sektorë si ndërtimtaria, transporti, gastronomia dhe kujdesi për persona.

Agjencia Federale e Punësimit kundërshton planin e qeverisë dhe kërkon ruajtjen e kuotës aktuale, me arsyetimin se kërkesa për punëtorë mbetet e lartë. Vanessa Ahuja, anëtare e bordit të Agjencisë Federale të Punësimit për shërbimet dhe çështjet ndërkombëtare, ka deklaruar se rregullorja dëshmon integrimin e lartë në tregun e punës. Sipas saj, kuota aktuale nuk ka mjaftuar për të gjitha aplikimet as gjatë vitit 2025 dhe pritet të shterohet para përfundimit të vitit 2026, ndërsa përgjysmimi i saj mund t'ua vështirësojë kompanive gjermane gjetjen e punëtorëve.

Nëse ky plan zbatohet, nga janari i vitit 2027 do të ketë më pak vende të disponueshme për aplikantët nga të gjitha shtetet e përfshira në rregullore, ndërkohë që miratimi i punësimit vazhdon të bëhet përmes agjencisë gjermane sipas kuotave mujore dhe shtetësive.