Kurti dhe Rama do të marrin pjesë në samitin e Procesit të Berlinit

Kryeministri i Kosovës, Albin Kurti, dhe kryeministri i Shqipërisë, Edi Rama, do të marrin pjesë pasnesër në Samitin e Liderëve të Procesit të Berlinit, i cili do të zhvillohet në Miloçer të Budvës në Mal të Zi. Në këtë takim të nivelit të lartë do të jenë të pranishëm udhëheqës nga rajoni dhe Europa, përfshirë kancelarin gjerman Friedrich Merz.

Procesi i Berlinit shërben si një platformë ndërqeveritare për të nxitur bashkëpunimin ndërmjet vendeve të Ballkanit Perëndimor dhe integrimin e tyre në Bashkimin Evropian. Takimi i ardhshëm në bregdetin malazez mbledh krerët e shteteve dhe qeverive për të diskutuar hapat e mëtejshëm të këtij procesi.

Përveç Kurtit, Ramës dhe kancelarit Merz, në samit do të marrin pjesë kryeministri i Maqedonisë së Veriut, Hristijan Mickoski, dhe kryeministri i Kroacisë, Andrej Plenkoviq. Gjithashtu do të marrin pjesë zyrtarë të lartë të Bashkimit Evropian, institucioneve ndërkombëtare dhe përfaqësues politikë. Komisioni Evropian njoftoi se komisionarja për Zgjerim, Marta Kos, do të jetë pjesëmarrëse dhe do të diskutojë me udhëheqësit malazezë për reformat e nevojshme dhe ecurinë e Malit të Zi drejt anëtarësimit në BE. Sipas raportimeve të mediave malazeze, komisionarja Kos pritet të zhvillojë edhe një takim të veçantë me kryeministrin Albin Kurti për të biseduar rreth zhvillimeve të fundit në Kosovë. Qeveria e Malit të Zi ka publikuar listën e pjesëmarrësve, ku përfshihen drejtues nga Banka Evropiane për Rindërtim dhe Zhvillim, Banka Botërore, Banka Evropiane e Investimeve dhe Këshilli i Bashkëpunimit Rajonal.

Tema kryesore që pritet të trajtohen në axhendën e punimeve janë bashkëpunimi rajonal, ndërlidhja mes vendeve dhe integrimi evropian i shteteve të Ballkanit Perëndimor.