Gjashtë vjet burg për tentativën e shitjes së pronës së AKP-së me dokumente false

Gjykata Themelore në Prishtinë ka shpallur fajtor Sh.B. për falsifikim dokumentesh dhe mashtrim në tentativë, duke i shqiptuar dënim me gjashtë vjet burgim dhe 2 mijë euro gjobë. Sipas njoftimit të Gjykatës, i akuzuari kishte tentuar t'ia shiste të dëmtuarit A.H. një pronë në Prishtinë me vlerë 800 mijë euro, e cila ishte nën menaxhim të Agjencisë Kosovare të Privatizimit.

Dokumentet për pronën ishin falsifikuar përmes akteve noteriale, por verifikimi nga noterja V.A. zbuloi se autorizimi në emër të të pandehurit ishte i falsifikuar, duke bërë që vepra të mbetej në tentativë. Gjykata urdhëroi konfiskimin e përhershëm të dokumentit të falsifikuar dhe obligoi të akuzuarin të paguajë 200 euro për paushallin gjyqësor dhe 20 euro për Programin për Kompensimin e Viktimave të Krimit, brenda 15 ditësh pas plotfuqishmërisë së aktgjykimit.

I dëmtuari është udhëzuar që kërkesën pasurore-juridike ta realizojë në kontest të rregullt juridiko-civil, ndërsa i akuzuari mbrohet në liri deri në plotfuqishmërinë e aktgjykimit.