Gjashtë tendencat e bukurisë që do të dominojnë vjeshtën dhe dimrin 2026/2027

Gjashtë tendenca kryesore të bukurisë do të dominojnë sezonin e vjeshtës dhe dimrit 2026/2027, sipas përzgjedhjes së revistës ELLE, duke i dhënë përparësi guximit, individualitetit dhe bukurisë pa rregulla të ngurta gjatë muajve të ftohtë.

Në sezonet e mëparshme përkujdesja e pamjes karakterizohej nga përdorimi i grimit minimalist, flokët e lëmuar dhe përpjekja për të arritur një pamje sa më të përsosur. Vjeshta dhe dimri i këtij viti sjellin një ndryshim të dukshëm, ku pranohet lëvizja e lirshme e flokëve, ngjyrat e theksuara dhe stili më personal.

Sipas revistës ELLE, në prapaskenat e sfilatave të zhvilluara në Nju-Jork, Londër, Milano dhe Paris, specialistët e flokëve dhe grimit kanë krijuar stile ku përsosmëria nuk është më kërkesë kryesore. Në stilet e reja, ndarja e flokëve anash rikthehet në modë pas disa sezonesh ku mbizotëronte ndarja në mes, duke ndërthurur frymëzimin nga fillimi i viteve 2000 me elegancën bashkëkohore. Kjo mbetet e përshtatshme për ato që duan të ndryshojnë pamjen pa i prerë apo ngjyrosur flokët, qoftë me valëzime të buta apo të lëmuara pranë kokës.

Ndërkohë, në sfilatat e shtëpive të modës Chanel dhe Max Mara janë vërejtur prerje të shkurtra me karakter të guximshëm që ndërthurin tiparet femërore dhe mashkullore. Përveç kësaj, një tjetër tendencë e frymëzuar nga eleganca franceze përfshin flokët që duken sikur janë rregulluar shpejt e pa përpjekje, ku fijet e lira dhe valëzimet natyrale konsiderohen pjesë e stilit. Lidhur me kujdesin e lëkurës, përdorimi i produkteve që reflektojnë dritën sjell një shkëlqim të theksuar në mollëza, në pjesën e sipërme të hundës, si dhe me grimca vezulluese në qepalla apo buzë.

Për sa i përket grimit të fytyrës, stili i njohur si smokey eye rikthehet me hije të errëta e të shpërndara lirshëm rreth syve, pa kërkuar vija të përsosura apo kalime të sakta ngjyrash. Gjithashtu, skuqja e theksuar e faqeve me ngjyrë rozë vendoset më lart mbi mollëza dhe kalon mbi hundë e pranë syve, duke krijuar pamjen e një fytyre të freskët nga ajri i ftohtë i dimrit.

Ekspertët e modës presin që këto gjashtë tendenca të ndikojnë drejtpërdrejt në mënyrën se si do të rregullohen flokët dhe si do të aplikohet grimi gjatë gjithë muajve të ardhshëm të ftohtë.

Sipas revistës ELLE, këtë sezon nuk kërkohet më përsosmëri në çdo hollësi dhe një fije floku që del nga modeli ose një grim paksa i shpërndarë mund të bëhet pjesë e qëllimshme e stilit.