Mbappe i kërkon falje Kinës pasi e quajti diktator Mao Ce Dunin dhe humbi sponsorët

Sulmuesi i Real Madridit dhe kapiteni 27-vjeçar i kombëtares franceze, Kylian Mbappe, ka kërkuar falje publike ndaj Kinës pas reagimeve të ashpra që shkaktoi deklarata e tij ku e quajti diktator ish-udhëheqësin kinez Mao Ce Dun. Ngjarja ka sjellë humbjen e disa marrëveshjeve komerciale me kompani kineze dhe bllokim të transmetimeve televizive.

Përplasja nisi pas publikimit të një videoje në internet ku futbollisti francez po fliste për memet me imazhin e tij që qarkullojnë në rrjet. Duke komentuar një fotomontazh ku fytyra e tij ishte vendosur mbi trupin e Mao Ce Dunit, themeluesit të Republikës Popullore të Kinës i cili vdiq në vitin 1976, lojtari iu referua figurës historike si diktator. Deklarata u cilësua fyese ndaj popullit dhe historisë së vendit në rrjetet sociale kineze, ku Mbappe gëzonte më parë popullsi të madhe dhe miliona ndjekës.

Pas këtij incidenti, kompanitë kineze Dongpeng, Mengniu dhe Milkground njoftuan ndërprerjen e menjëhershme të bashkëpunimit me futbollistin francez. Kompania e pijeve Dongpeng deklaroi se zbaton një politikë zero tolerance ndaj çdo sjelljeje që ofendon ndjenjat kombëtare, ndërsa reklamat e tij të krijuara me inteligjencë artificiale ishin shfaqur gjatë Kupës së Botës. Edhe prodhuesi i qumështit Mengniu njoftoi se i ka dhënë fund partneritetit me sulmuesin.

Sipas raportimeve mediatike, televizioni shtetëror kinez pezulloi transmetimet e ndeshjeve të La Ligës dhe hoqi materialet promovuese me imazhin e lojtarit. Nga ana e saj, La Liga shprehu keqardhje për reagimet e shkaktuara, duke sqaruar se komentet ishin bërë në cilësinë personale të futbollistit.

Përballë pasojave, futbollisti u shpreh se komenti nuk u bë me qëllim shkaktimin e shqetësimit dhe se ishte i pamenduar mirë. Ai deklaroi se ka respekt të thellë për popullin kinez dhe historinë e tij. “Ju kërkoj falje të gjithëve që janë ndier të ofenduar nga fjalët e mia. Ky nuk ishte aspak qëllimi im. Kam respekt të thellë për popullin kinez dhe historinë e tij, dhe më vjen sinqerisht keq”, deklaroi sulmuesi.