GIZ-i dhe OEGjK-ja nënshkruajnë marrëveshje për energjinë e ripërtëritshme
E nënshkruan Marianne Alker e GIZ-it dhe Besnik Vasolli, drejtor ekzekutiv i OEGjK-së.
PRISHTINË — GIZ-i dhe Oda Ekonomike Gjermano-Kosovare (OEGjK–KDWV) kanë nënshkruar një marrëveshje granti për forcimin e bashkëpunimit dhe promovimin e mundësive për investime në sektorin e energjisë së ripërtëritshme në Kosovë.
Marrëveshja u nënshkrua në zyrën e GIZ-it në Prishtinë nga Marianne Alker, udhëheqëse e ekipit të projektit IKI “Mbështetje për Partneritetin për Tranzicionin Klimatik dhe Energjetik”, dhe Besnik Vasolli, drejtor ekzekutiv i Odës Ekonomike Gjermano-Kosovare (OEGjK–KDWV).
Përmes këtij bashkëpunimi, GIZ-i dhe OEGjK–KDWV synojnë të lidhin investitorët gjermanë me institucionet kosovare, institucionet financiare dhe zhvilluesit e projekteve të energjisë së ripërtëritshme. Nisma ndihmon në krijimin e lidhjeve më të fuqishme ndërmjet akterëve të përfshirë në zhvillimin, financimin dhe zbatimin e investimeve.
Aktivitetet e planifikuara përfshijnë një forum investimesh, tryeza të rrumbullakëta me palët e interesit, ngjarje të rrjetëzimit dhe sesione të synuara për lidhjen e bizneseve. Investitorëve dhe zhvilluesve të projekteve do t’u ofrohen informata praktike mbi kërkesat rregullatore, teknike dhe financiare që lidhen me investimet në energjinë e ripërtëritshme në Kosovë.
“Kjo marrëveshje granti përfaqëson një hap të rëndësishëm në përkthimin e Partneritetit Kosovë–Gjermani për Tranzicionin Klimatik dhe Energjetik në bashkëpunim konkret me sektorin privat”, tha Marianne Alker. Granti kontribuon në përpjekjet më të gjera të partneritetit, me synim avancimin e energjisë së ripërtëritshme dhe mbështetjen e tranzicionit drejt një sistemi energjetik më të pastër e të qëndrueshëm.
Burim: Epoka e Re
— Redaksia ZHURMA