Gërvalla: Dorëheqjen do ta jepja po të kontribuonte në zbardhjen e rasteve

Ministrja e Drejtësisë, Donika Gërvalla, është përballur me thirrje për dorëheqje pas vrasjes së Arlinda Zekajt, një rast që ka nxitur reagime dhe kërkesa për përgjegjësi institucionale. E pyetur lidhur me këto kërkesa, ajo ka deklaruar se nuk e konsideron dorëheqjen si mekanizëm që do të ndihmonte në identifikimin e shpejtë dhe të thellë të përgjegjësive për veprim ose mosveprim.

Gërvalla ka theksuar se po të besonte se largimi i saj nga detyra do të kontribuonte në zbardhjen e përgjegjësive, ajo nuk do të hezitonte ta ndërmerrte këtë hap. Sipas saj, e vërteta është krejt ndryshe dhe qytetarët e dinë se ajo gjithë jetën e saj politike ka qenë në anën e viktimave me një kosto të lartë publike. Ajo ka shtuar se viktimat e dhunës në familje e kanë aleatin më të fuqishëm te koordinatorja kombëtare dhe ka kërkuar që t'i lejohet të vazhdojë punën për të adresuar përgjegjësitë.

«Po të konsideroja që dorëheqja do të ishte mekanizmi për të cilin do të kontribonim për një identifikim më të saktë më të shpejtë dhe më të thellë të përgjegjësive për veprim dhe mosveprim, unë do kisha dhënë dorëheqje», ka deklaruar ajo, duke ftuar që çështja e dorëheqjeve të diskutohet sërish pasi të identifikohen dhe adresohen përgjegjësitë.