Supremja vendos se Policia nuk mund t’ua mbajë patentë-shoferët më shumë se tetë ditë

Gjykata Supreme e Kosovës ka vendosur se Policia e Kosovës nuk mund t’ua mbajë shoferëve patentë-shoferët për më shumë se tetë ditë. Gjykata e ka shpallur të paligjshëm dhe e ka shfuqizuar përcaktimin që e lidhte kthimin e dokumentit me përfundimin e masës mbrojtëse të ndalimit të drejtimit të mjetit, duke e miratuar pjesërisht padinë e 28 qytetarëve.

Akti nënligjor i kontestuar ishte Udhëzimi Administrativ i Ministrisë së Punëve të Brendshme Nr. 05/2023 për Procedurat e Kundërvajtjes. Paragrafi 3 i nenit 17 të këtij udhëzimi përcaktonte se patentë-shoferi mund t’i kthehej palës vetëm mbasi të përfundonte plotësisht masa mbrojtëse e ndalimit të drejtimit të automjetit. Kjo gjendje ligjore bënte që dokumentet të mbaheshin nga organet e rendit për periudha kohore që zgjasnin tre, gjashtë apo edhe dymbëdhjetë muaj. Për këtë arsye, 28 paditës i patën drejtuar padi me konflikt administrativ institucioneve përgjegjëse, përkatësisht Ministrisë së Punëve të Brendshme dhe Policisë së Kosovës, duke kërkuar shfuqizimin e kësaj rregulle nënligjore.

Kolegji i Gjykatës Supreme ka arsyetuar se marrja e përkohshme e patentë-shoferit nga policia dhe masa mbrojtëse e ndalimit të drejtimit të mjetit përbëjnë dy institute të ndrysh me juridike, të cilat nuk duhet të ngatërrohen gjatë zbatimit të tyre në praktikë. Gjykata ka sqaruar sipas nenit 244 të Ligjit nr. 08/L-186 për Rregullat e Trafikut Rrugor se mbajtja e përkohshme e dokumentit nga policia lejohet me ligj vetëm deri në tetë ditë. Për rrjedhojë, sipas vlerësimit të trupit gjykues, kushtëzimi i tërheqjes apo kthimit të dokumentit me përfundimin e masës mbrojtëse shumëmujore bie në kundërshtim të drejtpërdrejtë me ligjin bazë, pasi një akt nënligjor i nxjerrë nga ministria nuk mund të zgjerojë kompetencat ligjore dhe as të vendosë kufizime shtesë pa bazë ligjore.

Në të njëjtën kohë, Gjykata Supreme ka refuzuar si të pabazuar kërkesëpadinë e paditësve për shfuqizimin e paragrafëve 1 dhe 2 të nenit 17 të të njëjtit udhëzim administrativ. Gjykata ka vlerësuar se këto dy dispozita kanë thjesht karakter procedural dhe organizativ. Ato përcaktojnë njësinë policore përgjegjëse për administrimin e dokumentit si dhe detyrimin për lëshimin e vërtetimit zyrtar për marrjen e përkohshme të patentë-shoferit, pa tejkaluar autorizimet që janë përcaktuar me ligj.

Zbatimi i këtij vendimi të Gjykatës Supreme obligon Policinë e Kosovës dhe Ministrinë e Punëve të Brendshme që të ndërpresin mbajtjen e patentë-shoferëve përtej afatit prej tetë ditësh, ndërsa kthimi i dokumenteve te shoferët nuk do të mund të kushtëzohet më me kohëzgjatjen e masës mbrojtëse.

Gjykata Supreme deklaroi në njoftimin e saj se «mbajtja e përkohshme e patentë-shoferit nga policia nuk mund të zgjasë më shumë se tetë ditë» dhe se marrja e dokumentit e masa mbrojtëse «janë dy institute të ndryshme juridike, të cilat nuk duhet të ngatërrohen gjatë zbatimit të tyre».