Georgievski: VMRO-DPMNE-ja largohet nga ideale e themelimit
Në 2 Gushtin, ai krahasoi fillimet e partisë me Ilindenin e 1903-ës dhe ASNOM-in e 1944-ës, duke thënë se trashëgimia historike është reduktuar në simbole ceremoniale.
SHKUP — Në Ditën e Republikës, 2 Gusht, ish-kryeministri dhe një prej themeluesve të VMRO-DPMNE-së, Ljupço Georgievski, publikoi një mesazh kritik ndaj zhvillimeve aktuale politike në Maqedoninë e Veriut, duke bërë një analizë të ashpër për gjendjen e partisë që vetë e themeloi në fillim të viteve të nëntëdhjeta.
Georgievski, i cili ishte kryetar i parë i partisë dhe më vonë kryeministër i vendit, tërhoqi paralele mes ideve të themelimit të VMRO-DPMNE-së në 1990 dhe politikave aktuale. Ai tha se krijimi i saj ishte parë si “mision historik” mbi synimin për pavarësi dhe orientim të pavarur politik të Maqedonisë.
“Qëllim parësor e kisha pavarësinë e Maqedonisë, jashtë kthetrave të politikës serbomadhe”, theksoi ai. Në mesazh u ndal edhe te dy ngjarjet e 2 Gushtit: Kryengritja e Ilindenit e 1903-ës dhe mbledhja e ASNOM-it në 1944. Sipas tij, pavarësisht rëndësisë historike, sot ato trajtohen vetëm si simbole ceremoniale, pa reflektim mbi idetë dhe mesazhet që kanë bartur.
Ai rikujtoi se Kryengritja e Ilindenit nisi në 1903 në rajonin e Manastirit, me figura si Boris Sarafov, Dame Gruev dhe Atanas Lozançev. “Vështirë se nga verbëria jonë ideologjike mund ta shohim madhështinë e vërtetë të kryengritjes”, shkroi ai. Mbi ASNOM-in, ai tha se aty ishin prezantuar ide të mëdha politike, por se zhvillimet e mëpasshme ndryshuan rrjedhën.
Ai sulmoi edhe kursin aktual të VMRO-DPMNE-së, duke thënë se partia është larguar nga idealet fillestare. “Partia që u themelua me ide të qarta për shtet të pavarur dhe identitet të fortë, sot është larguar nga vizioni fillestar”, theksoi ish-kryeministri. Deklarata vjen në një periudhë kur debatet mbi identitetin, historinë dhe drejtimin strategjik vazhdojnë të dominojnë skenën politike maqedonase.
Burim: Tetova Sot
— Redaksia ZHURMA
