Pse mungon Kosova në rrjetet rajonale të gazit amerikan?

PRISHTINË — Debati për furnizimin me gaz të lëngshëm natyror nga Shtetet e Bashkuara është rikthyer në Kosovë, ndërsa Uashingtoni rrit praninë energjetike në Ballkanin Perëndimor. Oda Ekonomike Amerikane në Kosovë ka prezantuar një dokument që trajton potencialin e gazit amerikan për vendin.

Drejtori ekzekutiv i Odës, Arian Zeka, vlerëson se gazi amerikan mund të luajë rol kyç në forcimin e sigurisë energjetike të Kosovës. "Siguria energjetike sot është e barasvlershme me sigurinë kombëtare", thotë ai në një intervistë për \1 e Lirë. Sipas Zekës, një alternativë e tillë do ta ulte varësinë e Kosovës nga importi i energjisë elektrike dhe do të siguronte stabilitet më të madh në çmimet e rrymës.

Zeka e konsideron shqetësuese mungesën e një qëndrimi të qartë institucional për përfshirjen e Kosovës në rrjetet rajonale të gazit. "Gjithçka varet nga vullneti politik. Ndoshta jemi pak mbrapa në aspektin e legjislacionit ose të infrastrukturës ligjore. Financimi mund të sigurohet lehtë për këtë projekt. Prandaj, mungesa e qartë e një zotimi të Qeverisë, se Kosova do të bëhet pjesë e një infrastrukture të tillë, është pak paradoksale", thekson ai.

Ambasada amerikane në Prishtinë, përmes një postimi në Facebook më 28 maj, ka shprehur gatishmërinë për të bashkëpunuar me Kosovën në "zgjidhje energjetike të sigurta dhe të diversifikuara". Në Samitin Trans-Atlantik për Sigurinë e Gazit në shkurt, ministrja në detyrë e Ekonomisë, Artane Rizvanolli, shprehu gatishmërinë e Kosovës për t'u furnizuar me gaz natyror nga \1-ja, duke e cilësuar këtë bashkëpunim si vendimtar.

Megjithatë, në fillim të majit, Radio Evropa e Lirë iu drejtua Ministrisë së Ekonomisë me pyetje për planet konkrete për lidhjen me rrjetin rajonal të gazit, por nuk mori përgjigje. I dërguari i posaçëm i Departamentit amerikan të Energjisë, Joshua Volz, thotë se sistemi energjetik i Kosovës ka nevojë urgjente për modernizim, por projektet e mëdha do të varen nga përmirësimi i mjedisit biznesor dhe rregullator në vend. Gjatë javëve të fundit, SHBA-ja ka nënshkruar marrëveshje miliardëshe me vende të tjera të Ballkanit Perëndimor, por Kosova ka mbetur jashtë kësaj vale investimesh.

Burim: Lajmi.net
— Redaksia ZHURMA