Dajaku: Te Bayerni qëndroja deri në dy orë në makinë

Futbollisti me origjinë nga Kosova, Leon Dajaku, ka rrëfyer sfidat psikologjike dhe periudhën e tij te Bayern Munich, ku në verën e vitit 2019 u transferua për rreth 1.5 milion euro pasi ishte rritur në akademinë e Stuttgartit.

Karriera e Leon Dajakut dikur shihej me shumë premtime në futbollin gjerman, teksa ai ishte dalluar si një ndër talentet e rinj më premtues. Përvoja e tij e hershme përfshinte sukseset në akademinë e Stuttgartit, ku u shpall kampion i Gjermanisë me ekipet U17 dhe U19, ndërsa në moshën 16 deri në 17 vjeç kishte nisur të stërvitej edhe me skuadrën e parë para kalimit te gjiganti bavarez.

Në periudhën e tij te Bayern Munich, Dajaku ka pasur rastin të ndajë fushën e stërvitjes me emra të njohur botërorë si Manuel Neuer, Thomas Muller, Robert Lewandowski, Joshua Kimmich dhe Philippe Coutinho. Sipas tij, prania e këtyre yjeve në fillim e bënte të ndihej në siklet dhe të intimiduar në dhomën e zhveshjes. Ai ka treguar se kur e kishte përballë Robert Lewandowskin nuk dinte as se si ta përshëndeste, pasi deri atëherë e kishte parë vetëm përmes ekranit të televizorit.

Rritja e shpejtë në karrierë solli gjithashtu sfida të mëdha në jetën jashtë fushës për futbollistin. Kur ishte 17 deri në 18 vjeç, atij i duhej të kuptonte se cilët njerëz i qëndronin pranë si miq të vërtetë dhe cilët i afroheshin vetëm për shkak të famës dhe statusit të ri që kishte krijuar duke luajtur te Bayerni, një rreth shoqëror ky që nuk e kishte pasur më parë.

Ngarkesa e madhe psikologjike ndikoi gjithashtu në jetën e tij familjare. Dajaku ka rrëfyer se ka kaluar periudha të rënda emocionale, deri në atë pikë saqë ndonjëherë, përpara se të hynte në shtëpi, qëndronte deri në dy orë në veturë për t'u qetësuar. Ai shpjegon se i duhej kohë për të mbledhur veten, sepse nuk dëshironte t'ia përcillte gjendjen e tij emocionale bashkëshortes dhe vajzës sime.

Një tjetër kapitull i karrierës së tij ishte edhe ai në Dubai, ku pranoi një ofertë prej 60 mijë eurosh neto në muaj. Sapo ishte bërë baba dhe rrezikonte të mbetej pa klub, ai e pa këtë si zgjidhjen më të përshtatshme për të fituar të ardhurat e ofruara gjatë një periudhe katërmujore. Megjithatë, gjendja e tij psikologjike mbeti e rëndë edhe atje, deri në atë masë sa në një rast refuzoi të udhëtonte me ekipin drejt finales së një kompeticioni me pretekstin se ishte i lëmtuar, ndonëse fizikisht nuk kishte asnjë dëmtim.

Në përfundim të rrëfimit të tij, Dajaku ka hedhur poshtë çdo pretendim se transferimet te klubet e mëdha si Bayern Munich apo Sunderland ishin motivuar nga përfitimet financiare. Ai ka deklaruar se nuk i ka ndjekur paratë, por është transferuar sepse në ato momente besonte se po merrte vendimin dhe hapin e duhur për zhvillimin e karrierës së tij.