Pse FSK-ja mbeti pa gjashtë gjeneralë në pozitat kryesore?

PRISHTINË — Forca e Sigurisë së Kosovës po përballet me një zbrazëti të konsiderueshme në komandë, pasi gjashtë pozita të gjeneraleve kanë mbetur të paplotësuara. Sipas strukturës zyrtare, FSK-ja duhet të ketë gjithsej 11 gjeneralë, por aktualisht operon me vetëm 5, një situatë e krijuar gjatë mandatit të qeverisjes së Lëvizjes Vetëvendosje nën drejtimin e Albin Kurtit.

Mungesat janë shënuar në pikat më kritike të zinxhirit komandues. Bosh ka mbetur posti i gjeneralit në Shtabin e Përgjithshëm të FSK-së, si dhe në Komandën e Forcave Tokësore, Gardën Kombëtare dhe Komandën e Logjistikës. Gjithashtu, nuk janë plotësuar pozitat e gjeneraleve në Drejtorinë e Inteligjencës dhe Drejtorinë e Burimeve Njerëzore.

Bazuar në nenin 16 të Ligjit për FSK-në, Presidenti i Republikës kryen gradimet dhe emërimet e gjeneraleve bazuar në rekomandimin e përbashkët të Komandantit të FSK-së dhe Ministrit. Kjo vendos përgjegjësinë institucionale mbi Ministrin e Mbrojtjes, Ejup Maqedonci, Komandantin e FSK-së dhe Presidenten e vendit, të cilët nuk kanë siguruar emërimet e nevojshme.

Kjo mungesë e kuadrove strategjike ndikon drejtpërdrejt në planifikimin operacional, koordinimin e njësive dhe zhvillimin profesional të ushtrisë. Zbrazëtia në këto pozita kyçe rrezikon stabilitetin e zinxhirit komandues në një kohë kur funksionimi profesional është prioritet për sigurinë kombëtare.

Burim: Vox Kosova
— Redaksia ZHURMA