Sa milionë euro iu morën buxhetit të Kosovës nëpërmjet vendimeve gjyqësore?

PRISHTINË — Buxhetit të shtetit të Kosovës i janë marrë 45.7 milionë euro brenda një viti, vetëm nëpërmjet vendimeve gjyqësore, ka deklaruar auditorja e përgjithshme, Vlora Spanca.

Spanca ka sqaruar se auditimet e Zyrës së Auditorit të Përgjithshëm (ZKA) kanë zbuluar vonesa në pagesa deri në 131 ditë, si dhe mungesë dokumentacioni për ndarjen e saktë të kamatave dhe shpenzimeve përmbarimore. "Gjatë vitit 2025, vlera e pagesave të realizuara përmes vendimeve gjyqësore arriti në 45,691,077 euro," ka thënë ajo.

Problemet identifikuar përfshijnë mangësi në klasifikimin, dokumentimin dhe verifikimin e pagesave, si dhe vonesa në realizimin e tyre përtej afatit ligjor prej 30 ditësh. Nga kategoria e investimeve kapitale, janë realizuar nëntë pagesa me vlerë 4.5 milionë euro, ndërsa shpenzimet për kamata dhe përmbarim kanë qenë 81,800 euro.

Në kategorinë e mallrave dhe shërbimeve, janë testuar 16 pagesa me vlerë 3.96 milionë euro. Për pesë prej tyre, ZKA ka siguruar dëshmi për shpenzimet e përmbarimit prej 226,851 euro, ndërsa për 11 pagesa tjera, mungojnë urdhrat përmbarimorë, duke penguar ndarjen e saktë të vlerës bazë, kamatës dhe shpenzimeve.

Një rast tjetër përfshin një pagesë prej 147,143 euro për paga jubilare, ku 11,758 euro iu paguan dy punonjësve të Ministrisë së Punëve të Brendshme, por nga buxheti i Komunës së Prishtinës. "Këta punonjës ishin përfshirë në listën e pagesës së Komunës," ka sqaruar Spanca.

Raporti i ZKA-së për vitin 2025 tregon se nga 94 raporte të auditimit financiar dhe të pajtueshmërisë, janë dhënë 55 opinione të kualifikuara, 4 të kundërta dhe 35 të pamodifikuara. Problem kryesor mbetet pasaktësia në raportimin financiar, shkeljet në procedurat e prokurimit dhe mangësitë në menaxhimin e kontratave.

Komuna e Prishtinës është në qendër të kritikave, me opinion të kualifikuar për pasqyrat financiare dhe konkluzion të kundërt për pajtueshmërinë. ZKA ka identifikuar klasifikim të gabuar të shpenzimeve në 52 raste, me vlerë mbi 7.7 milionë euro, si dhe mbivlerësim të detyrimeve kontingjente mbi 27 milionë euro.

Burim: Koha.net
— Redaksia ZHURMA