Mbi 81 për qind e kosovarëve morën leje qëndrimi në Zvicër nga bashkimi familjar

Gjatë vitit 2025, gjithsej 1,538 shtetas të Kosovës fituan leje qëndrimi afatgjatë në Zvicër përmes bashkimit familjar, shifër kjo që përbën 81.9 për qind të totalit të kosovarëve të pranuar në këtë shtet. Sekretariati Shtetëror për Migracion njoftoi se bashkimi familjar mbetet rruga kryesore e emigrimit, ndërsa vetëm 339 kosovarë siguruan leje përmes kategorive të tjera.

Te komunitetet e tjera të huaja në Zvicër, ribashkimi familjar përfaqësonte 25.5 për qind të imigracionit total në popullsinë e përhershme të huaj rezidente. Gjatë vitit 2024, në këtë kategori kishin hyrë 42,433 persona ose 24.9 për qind, ndërsa në vitin 2025 numri i përgjithshëm i të huajve që hynë përmes kësaj rruge u ul pak në 42,170 persona. Përafërsisht 15.4 për qind e këtij grupi të përgjithshëm, me rreth 6,500 persona, lidhej me ribashkimin me një shtetas zviceran.

Për sa i përket 18 për qindëshit të mbetur të kosovarëve të pranuar në vitin 2025, sipas të dhënave të Sekretariatit Shtetëror për Migracion, afërsisht 7 për qind e lejeve u dhanë përmes punësimit. Mundësitë për punësim mbeten të kufizuara pasi Kosova konsiderohet vend i tretë. Për vitin 2025, në të gjithë Zvicrën kishin mbetur në dispozicion 4,500 leje qëndrimi B dhe 4,000 leje afatshkurtra L për shtetasit e vendeve të treta, ku pengesat janë të larta dhe vlejnë vetëm për profesionistët me kualifikim të lartë, Krahas kësaj, përparësia ligjore u jepet shtetasve zviceranë.

Kategoritë e tjera të pranimit për kosovarët përfshijnë arsimin dhe trajnimin me rreth 5 për qind, ku hyjnë vizat për studentë apo me programe shkollore e universitare. Ndërkaq, rreth 6 për qind përfshijnë arsyet humanitare, mjekësore apo raste të tjera të rënda. Procedura e rregullt e azilit nuk luan pothuajse asnjë rol statistikor për shtetasit nga Kosova në praktikat zvicerane të migracionit.