Formë e shkëlqyer për Baton Zabërgjën në Ukrainë

Baton Zabërgja po kalon një periudhë të shkëlqyer me skuadrën ukrainase Metalist 1925 Kharkiv, ku është shndërruar në një nga figurat kryesore. Sulmuesi ka realizuar shtatë gola dhe ka dhënë katër asistime në nëntë paraqitje në të gjitha garat, ndërsa është përzgjedhur katër herë në formacionin më të mirë të javës.

Në një intervistë, ai ka folur për formën e tij aktuale, angazhimin me Kombëtaren e Kosovës dhe objektivat me klubin për sezonin në vazhdim. Paraqitjet e mira i kanë siguruar më shumë besim nga selektori Franco Foda, pasi në tri prej katër ndeshjeve të fundit ai e ka nisur takimin nga minuta e parë. Zabërgja i ka konsideruar rezultatet e Kosovës të kënaqshme, megjithëse mendon se skuadra mund të merrte tri pikët në duelin ndaj Izraelit.

Sa i përket ecurisë në Ukrainë, ai ka sqaruar se viti i parë në Kharkiv ishte i fokusuar te përshtatja dhe se rritja e minutave të luajtura ka ndikuar te paraqitjet e tij. Tani, në sezonin e dytë, ai synon të vazhdojë me të njëjtin nivel dhe nuk e përjashton mundësinë për t'u shpallur golashënuesi më i mirë në Ukrainë, teksa synon edhe kalimin në pesë ligat më të forta të Evropës.