Forcohen lidhjet ekonomike dhe kulturore të Kosovës me Izmirin
Aktivitetet e organizimit dyditor «Ditët e Kosovës» në Izmir sjellin në fokus partneritetet strategjike, bashkëpunimin tregtar dhe mbrojtjen.
Redaksia ZHURMA · · 2 min lexim
Në Izmir po zhvillohen aktivitetet e organizimit dyditor «Ditët e Kosovës», i cili synon forcimin e lidhjeve historike, kulturore dhe ekonomike ndërmjet Kosovës dhe Turqisë. Hapja e këtij eventi, që ka nisur më 20 nëntor, u bë në praninë e ministrit të Punëve të Brendshme të Kosovës, Xhelal Sveçla, kryetarit të Komunës së Izmirit, Cemil Tugay, dhe guvernatorit të Izmirit, Süleyman Elban, si dhe përfaqësuesve të komunave të ndryshme kosovare.
Gjatë Forumit të Biznesit Izmir-Kosovë u diskutuan mundësitë për bashkëpunim tregtar dhe investime. Ministri Sveçla theksoi se Turqia është një nga vendet që kontribuon më së shumti për Kosovën dhe se marrëdhëniet kanë avancuar përmes bashkëpunimeve strategjike. Ai bëri të ditur se në Kosovë po realizohet prodhimi i përbashkët i municioneve dhe se dy vendet kanë arritur marrëveshje për prodhimin e përbashkët të armëve e municioneve sipas standardeve të NATO-s. Nga ana e tij, guvernatori Elban u shpreh se raportet do të forcohen përmes marrëdhënieve të binjakëzimit të pushteteve lokale, investimeve të ndërsjella dhe shkëmbimeve të nxënësve e studentëve.
Kryetari Tugay njoftoi se në muajin prill planifikohet organizimi i një aktiviteti në Kosovë për promovimin e qytetit të Izmirit. Në hapësirat e Qendrës Kulturore të Fabrikës Historike të Gazit janë vendosur stenda me qytetet, artin, kulturën dhe specialitetet e kuzhinës kosovare e të Izmirit, ndërsa programi përfshin edhe koncerte e valle tradicionale.
Lexo edhe
Më shumë →Koleksione · të dhëna të verifikuara
Vazhdo me më të lexuarat sot
Përditësuar