Pse u pasurua fondi digjital i Bibliotekës 'Marin Barleti'?

Biblioteka Publike 'Marin Barleti' në Shkodër po e pasuron vazhdimisht fondin e saj digjital. Aktualisht, janë të aksesueshme online mbi 90 mijë faqe, kryesisht nga fondi i albanologjisë. Në proces digjitalizimi ndodhet aktualisht fondi i antikuarëve, i cili përfshin rreth 2 mijë botime të rralla.

Digjitalizimi i këtij fondi përbën një sfidë të veçantë, për shkak të vlerës historike të materialeve, por edhe gjendjes së tyre të amortizuar ndër vite. Fondi digjital i Bibliotekës Publike 'Marin Barleti' është i aksesueshëm edhe përmes rrjetit ndërkombëtar COBISS, platformë softuerike që lidh bibliotekat në nivel rajonal dhe ndërkombëtar në një sistem të unifikuar.

Biblioteka Publike 'Marin Barleti' numëron rreth 250 mijë libra, të organizuar në 12 fonde të veçanta. Procesi i digjitalizimit, i nisur në vitin 2017, është përqendruar kryesisht te fondet dhe koleksionet më të vjetra të bibliotekës.

Burim: Gazeta Tema
— Redaksia ZHURMA